Isumat.com/2:44PM,May 20, 2020
Magtitikang na pagka-abot an mga Leyteno nga na-stranded ha Metro Manila dara han corona virus lockdown nga igin-implementar ha bug-os nga nasud.
Sumala han impormasyon tikang ha Leyte Provincial Government, 112 ka tawo an maabot buwas hit kulop (Mayo 21, 2020) sakay hin mga bus tikang ha Manila. Nakatalaan an ira paglakat ha Manila yana nga kulop.
Ini nga batch han mga Balik-Probinsya in ginkokomponer hin mga OFWs ug mga taga Leyte nga naabtan han lockdown ha Manila. Syahan nga ira dadangatan an Holding ngan Assesment Area ha Government Center ha Candahug, Palo. Kataliwan hini, kukuhaon hira han mga behikulo han tagsatagsa nga bungto kun diin hira nag-uukoy.
Pag-abot ha ira mga bungto, igpapailarum hira hin swab testing. Samtang naghuhulat han resulta han swab test, didto anay hira temporaryo maukoy ha mga Quarantine Facilities. Kun negatibo an samples, makaka-uli na hira ngadto han ira panimalay, samtang kun may mag positibo han corona virus, dadad-on hira ha magkalainlain nga health facilities han probinsya.
An Leyte Provincial Government in nag-andam na hin Isolation Units para han mga magkaka-uli nga magpo-positibo han virus. Ini nga facilidad in namumutang ha Leyte Academic Center Gymnasium ha Palo. An nasabi nga facility nga mayda 130 bed capacity in gagamiton kun deri na maka-akomodar han covid patients an mga hospital han probinsya.
An Leyte in upod han napulo nga probinsya nga nahilakip han “pilot areas” kasumpay han programa nga Balik-Probinsya han Duterte administration. Panuyo hini nga ma-ibanan an duro hin kadamo nga popolasyon ha Metro Manila. # (KEVIN SIOSANA)
