Maghihimo na hin kaangayan nga aksyon an gobyerno mahitungod han waray wantas nga pag inumentuhon ha presyo han isda nga nagin mabug-at na nga paras-anon han mga kunsumidor.
Ha usa nga panmaki-ana, igin pahayag ni Dr. Juan Albaladejo, Regional Director han Bureau of Fisheries and Aquatic Resources (BFAR) han Eastern Visayas, nga an ira buhatan in nagmamalahimo na yana hin mga pitad basi magka may-ada hin price control ha pamresyuhan han isda ha mga merkado publiko.
Iya iginsumat nga an Department of Agriculture-Central Office sugad man an Department of Trade and Industry ngan Department of the Interior and Local Government in naghihimo na yana han mga aludayday kasumpay hini nga panuyu-anan.
Hi Albaladejo in nagdugang pa nga bisan an ira opisina in nahipapa-usa na kun kay-ano nga hadin nag-agi nga haros usa na ka tuig tubtob yana, waray hunong an paghinitaas ha presyo han isda ngan iba pa nga produkto tikang ha kadagatan.
Dara hini, iya iginpahayag nga kinahanglan na gud nga magkamay-ada hin SRP o suggested retail price an presyo han isda sugad han ginbubuhat ha iba pa nga mga produkto nga iginbabaligya ha mga tindahan ngan groceries. Iginbuyagyag gihapon han nasabi nga opisyal nga usa han mga rason hini nga sitwasyon amo an pagka may-ada hin tulo ka balitang o tulo ka lo-on hin mga tawo nga nagpe-presyo han isda.
Iya gin-esplikar nga tikang han mangirisda, mayda pa tulo ka grupo hin mga postor nga aagi-an han produkto antis ini dumangat ngadto ha mga magtirinda ha merkado sanglit nagsasapin-sapin na an napa ganansya hini. Matuod, gintagan hin duon ni Albaladejo nga ira gihapon igkokonsiderar an kahimtang han panahon kay usa ini han mga rasones kun kay-ano nagmamahal an presyo han isda.
Iginpananglitan pa ngani ni Alabaladejo an galungong nga naabot na ha dos syentos tobtob tres syentos an presyo han kada kilo, ug an tamban nga naabot na hin syento beinte an kada kilo hini. Bisan ngani an mga segunda klase nga isda in haros parehas na gihapon kahigtaas an presyo han mga ginkokonsiderar nga first class.
Denhi ha Rehiyon Otso, mayda na mga Local Government Units an ginmi-os basi manginano hini nga sitwason. An Maasin City in nagpatawag na hin pira nga fish vendors hadin nag-agi nga bulan basi papagbatunon han mga reklamo hin pagpasulabi han presyo, samtang an City Council han Borongan in manginginano gihapon han sugad hini nga mga reklamo han publiko. #
