(Image by cosmo.ph)

Isumat.com/8:09AM, May 21, 2020

Tinikangan kakulop (Mayo 20) an bug-os nga probinsya han Northern Samar in aada ha State of Calamity. Ini an iginpahayag ni Governor Edwin Ongchuan.

Nagdesisyon an Provincial Government nga igpailarum an lalawigan ha State of Calamity dara han grabe nga distroso durot han pagmalmal ni bagyo Ambo. Pinaagi hini, makakagpagawas hin pondo an probinsya tikang han Calamity Fund para makaghatag hin ayuda ha mga apektado nga katawhan.

Pira nga bungto han lalawigan an nag-antos hin duro nga pagbabaha ngan maabot ha 360 Mil ka tawo an apektado han bagyo. Haros umabot hin Dos Mil nga kabablayan an nagkaruruba dida han probinsya. Ginbabanabana nga maabot hin 130 Milyones pesos an danyos ha agricultura.

An Northern Samar in nananawagan gihapon hin kadagmitan nga ayuda sugad hin medesina, bugas, canned goods, banig, folding beds, moskitero ngan mga construction materials.

Naghahangyo gihapon hira hin mga Personal Protective Equipment (PPE) basi gamiton han ira mga frontliners nga nagdudul-ong han mga hinabang.

Hadin Lunes nga adlaw, siyam nga munisipalidad ha Eastern Samar an iginpa-ilarum gihapon ha State of Calamity. # (KEVIN SIOSANA)