Isumat.com/8:52AM, May 14, 2020

Gintatarhog nga paglapingka-on ni Bagyo Ambo in mga parte han Eastern ngan Northern Samar. Dida han ginpagawas nga advisory han PAG-ASA yana nga alas otso han aga, an mata ni Ambo in nasipatan ha 110 kilometros Sinirangan-Sur-Sinirangan han Borongan City.

An iya kinomo nga hangin harani ha sentro in 155km/hour samtang an surusubasko nga hangin in naabot hin 190km/hour. Nagi-os hi Ambo ha dereksyon han Katundan (Westward) ha 15km/hour.

Kun deri magbag-o an dereksyon ngan kamalaksi han iya pag-gi-os, ginbabanabana nga masampak ini ha katuna-an nga sakop han Eastern Samar ngan Northern Samar antis umabot an kagab-ihon yana nga adlaw. Kataliwan han pag landfall, matikadto hi Ambo ha dereksyon han Sorsogon Province ngan Albay.

Magigin duro hin kamabalod an kadagatan dida hini nga mga lugar ngan posible may matabo nga storm surge nga may kahitas-on nga tres metros ha mga baybayon han nasabi nga mga lugar.

An Signal#3 in gin-isa na ha bug-os nga Northern Samar ug mga bungto han Eastern Samar tikang ha Jipapad tobtob ha Borongan City. Signal #3 gihapon in pira nga mga bungto ngan syudad han Samar Province.

An Biliran ngan iba nga parte han Samar ngan Eastern Samar in aada ha Signal#2.

Aada naman ha Signal#1 an Tacloban City, Ormoc City ug mga bungto ha Norte nga dapit han Leyte tikang ha Calubian tobtob ha Palo.

Hi Ambo an gisasyahani nga bagyo nga sumulod ha Pilipinas yana nga tuig ngan ginkakabarak-an nga dako an danyos nga igdudurot hini ha infrastraktura ngan agrikultura, labot la han kadelikaduhan ha kinabuhi.

Ginkakahadlukan liwat an posible nga pagtapon han corona virus ha mga evacuation centers ha mga lugar nga may Positive Cases kun diin posible deri na mahipasunod an social distancing. # (KEVIN SIOSANA)