Damo na iton mga reklamo parti hiton serbisyo han tubig ha ilarom han partnership han Leyte Metropolitan Water District (LMWD) ngan Prime Water o kon tawagon na yana Prime Water Leyte Metro.

Kadam-an hini nga mga reklamo amo an ka waray awas han ira mga gripo ngan kon naawas man mahinay ngan danay ha tabis hiton gab-i o kon maagahon na ngan may mga higayon nga malubog pa gud it tubig nga na awas ha mga ripo. Pero ha luyo hini sige liwat it ira sukot hin kabaraydan hiton tubig.

An pakiana kay ano nga sugad man hini iton sitwasyon nga pag huna han mga tag kunsumo nga ma uroupay na an serbisyo han tubig kay an prime water naman an nag dudumara han operation nga mas mayda kapas hin panalapi ngan technical expertise nga amo an rason han pagka ada nira hin partnership.

Bisan kon deri sugad kadali nga ma solbar dayon an poblema han pag taga tubig kay ma agi ini hin mga proseso sugad han pag bag-o ngan pag ayad han linya han tubig upod na an pag limpyo han mga tubo nga padayon na ini nga gin bubuhat nira , porlominos ipapa bibaro ha publiko iton tinuod nga sitwasyon ngan iba pa nga mga detalye kay obligasyon ini hiton LMWD kumo usa nga government owned and controlled Corporation ngan katungod hiton mga tag kunsumo nga mahibaro.

Ha press Conference nga gin atinderan han local media ngan han mga representante han Prime Water Leyte Metro yana nga adlaw July 26, 2022 nahisabutan nga kulang na hin supply hin tubig tungod han pag damo na an nag pataud hin tubig labot la han mga araydon pa nga mga linya nga usa liwat nga rason han ka karag han tubig.

Ma sobra na kwarenta mil iton mga tag kunsumo hin tubig ha Tacloban ngan hiton pito pa nga mga bungto nga na sasakupan hiton LMWD tikang han sobra trenta mil la han waray pa an ira partnership.

Ha ilarom han kontrata han partnership obligasyon han Prime Water an pag develop hin bag-o nga pag kukuhaan hin tubig pero hasta ngada yana nga tulo naka tuig an nag labay waray pa man ini ka himo? Na hibaruan nga iton bag-o nga pag kukuhaan hin tubig amo an cabayongan river ha bungto han Jaro, Leyte.

Obligasyon hiton LMWD Management nga ma siguro nga matuman ini han prime water pero kay ano nga waray pa man tubtub yana.

Pamati han baton ni Mr. Gerundio Calabia an Chief han Administrative Services han LMWD durante han press conference ka parti hini nga isyu.