An iligal nga droga ug an granada nga nakuha tikang han suspetsado. (Photo by PDEA-Eastern Samar)

Isumat.com/9:26AM, Pebrero 17, 2021

Deri la iligal nga droga an nakumpiskar han mga otoridad dida han buy-bust operation ha Taft, Eastern Samar, kay nakuhaan pa hin granada an na-aresto nga suspetsado.

Subay han report tikang ha PDEA-Eastern Samar, an mga operatiba han ira ahensya upod an Eastern Samar Provincial PNP ngan Taft Municipal PNP an nakadakop han suspetsado nga hi Pedro Capon, alias Bokyo, dida han operasyon ha Brgy San Rafael han nasabi nga bungto, Pebrero 16, 2021.

An suspetsado nga hi Pedro Capon. (Photo by PDEA-Eastern Samar)

Syahan nga nakuha tikang kan Capon an duha ka sachet han iligal nga droga, ngan dida han body search, nakadiskubre pa an mga otoridad hin kadugangan nga duha ka sachet ngan granada sugad man an buy-bust money.

hi alias Bokyo in nakapaslak na ha detention facility ngan nakatalaan umatubang han mga kaso nga igsasampa kontra ha iya. #