Isumat.com/2:03PM, April 23, 2020

Ginseguro han Samar Provincial Hospital nga naka-andam hira pagtuman han mga responsibilidad kasumpay han mga sitwasyon nga mabutho dara han COVID-19.

Ini an nagin kabatunan han nasabi nga hospital mahitungod hin mga sumat-sumat ngan mga post ha social media nga nag-aalegar nga kulang an preparasyon ug waray pangandaman ha pagsurapo han nasabi nga sakit.

An SPH nga namumutang ha Catbalogan City in nagpagawas hin opisyal nga pahayag yana nga kulop nagmamalatumat nga tikang pa hadin Enero nakigsumpayan na hira ha Samar Provincial Government sugad man ha Department of Health basi magin andam an ira facilidadis ngan personales.

Nagpahayag pa an SPH nga hadin Marso 20, an DOH an nag-inspection han ira isolation ward nga nabulag ini han main building. Dida liwat han syahan nga semana han Abril, ira na ginkarawat an mga indibiduwal tikang ha Tarangnan basi manginano han ira kahimtang. Ini nga bungto an igindeklarar han DOH nga mayda na local transmission han corona virus.

Hapagkayana, mayda pito nga pasyente tikang ha Tarangnan nga gin-oobserbaran ha isolation unit, ngan deri hira mabaribad pag-confine hin iba pa nga pasyente tikang han nasabi nga bungto. Ira pa iginsumat nga ira na ginsasagdunan an pasyente nga igbabalhin ha referral hospital nga amo an EVRMC-Tacloban kun seryoso ngan deri na nira akos an pagdumara han komplikado nga sitwasyon.

An SPH in naghihimo gihapon hin mga pitad basi magkaada hin kapabilidad nga makagdumara hin Rapid Anti-Body Testing ngan nakaplastar na gihapon an plano nga magtukod hin kalugaringon nga Biomolecular Laboratory ha maabot nga panahon.

Nanawagan gihapon an SPH ha publiko hin pagka-intindihay ngan pagka-urusa labi na yana nga panahon hin dako nga krisis. Deri kita magmamalinangpuson kontra hini nga kataragman kun deri kita magkaka-urusa pahayag pa han Samar Provincial Hospital. #