An litrato han mga kalalakin-an nga nagmanman kan Board member Alma Uy. (Photos by BM Alma Uy)

Isumat.com/7:09AM, Abril 12, 2021

Para kan Catbalogan City Councilor Alma Uy, dako nga paki-ana kun kay-ano igpapailarum hiya hiya hin pagmanman o surveillance han militar.

Iginbuyagyag ni Uy nga kumpirmado nga mga kaapi han Military Intelligence han Philippine Army an upat nga kalalakin-an nga pira na ka adlaw nga nagliliyong-liyong ngan nagmomonitor han iya gin-uukyan ha Catbalogan City. Nagsering an City Councilor nga an pamunuan han Philippine Army an nag-angkon nga ira mga tauhan an gintutudlok han magbabalaud.

Nagpahayag daw an militar nga an ira mga tauhan in nagdudumara hin “practical exercises on casing and surveillance.”

Dara hini, nagpapaki-ana hi Uy kun kay-ano nga hiya an napili nga manmanan han militar. Sumala pa ha iya, nagpinanhinumdom hiya kun mayda ba niya nagin kliyente nga mga suspetsado nga rebelde o miembero han NPA dida han iya propesyon komo abogado, sanglit nagin intresado an militar pagmonitor ha iya.

Nagsumat hi Uy nga deri makatadungan nga igpapailarum hiya hin surveillance kay sangkay man niya an militar, ngan waray niya atraso ha militar nga angay niya kahadlukan. Iya pa ngani iginpahayag nga naghimo hiya hin pagtutdo han Anti-VAWCI Law ha Camp Lucban, Catbalogan hadto nga panahon.

Nagpapaki-ana yana hi Uy kun ano an hihimoon han MIB Trainees han mga litrato ngan impormasyon nga ira nahikay dida han surveillance.

Nabuksot han kampo ni Uy an aktibidadis han MIB Trainees kay kumpleto hin CCTV Cameras an iya panimalay ug an iya security personnel in nagsumat han gi-os han mga kaapi han militar.

Tungod hini, nangaro hin bulig ha PNP hi Uy ngan ginsitar han kapulisan an upat nga kalalakin-an. Nagkaplag an upat nga kalalakin-an pero usa ha ira an waray maka-ikyas ngan nagpakita hin Identification Card nga miembro hiya han MIB, pero dida han pag-imbestigar, peke an ngaran han lalaki dida han ID.

Iginsaysay pa ni Uy nga nagpahugot hiya hin seguridad katapos la nga ig-post han Gobernador ha social media an sarakyan ni Uy. Para kan Uy an ginbuhat han gobernador in delikado para han iya kinabuhi.

Hi Uy in nagpahayag nga peligroso an iya sitwasyon labi na nga nagtikang na paghimo hin aksyon an Ombudsman han iya ginpadangat nga surat mahitungod han kontrobersyal nga 3 bilyones pesos nga utang han probinsya.

Ginhihingyap gihapon ni Uy nga mapukan na paghadihadi hin pira nga pamilya ha Samar, an pagsalbar han Samar Athletic Field, an pagbalabag han 3 bilyones pesos nga utang sugad man an pagtalwas han gindidistroso nga kabakhawan ha Buri.

Hi Uy in pira ka beses nga nagin Board Member han probinsya han Samar antis hiya nagin konsehal han Catbalogan.#