Isumat.com/8:00AM,June 27, 2020
Ginbalabgan han mga otoridad nga makadu-ong ha Rawis Port, Borongan City in usa nga sarakyan pandagat tikang ha General Santos City kagab-i.
Sumala han impormasyon, sakay in 17 nga mangirisda han dako nga fishing boat nga madunggo unta ha Rawis, ini an pantalan ngan lugar ha Borongan nga bagsakan han isda. Pero waray sumugot an mga tinubyanan han balaud nga makahaw-as bisan hin-o tikang han sakayan.
Nadiskubre nga kulang hin mga dukumento an mga mangirisda labi na nga waray nira dara nga travel authority.
Yana nga aga, palalakton an sakayan tibalik ngadto han ira lugar.Hadin nag-agi nga Hunyo 13, paruparehas gihapon ini an nahitabo ha Rawis Port kay usa nga sakayan an umabot tikang ha Davao Occidental. An 29 nga mangirisda in kulang gihapon hin mga papeles salit waray tumugot an LGU nga makadu-ong hira ngan ginpabalik gihapon.
An Borongan City amo nala an nasasalin nga syudad ha Eastern Visayas nga COVID-free tobtob yana. # (KEVIN SIOSANA)
