Isumat.com/4:13AM, August 28, 2020

Tinikangan yana nga adlaw, Agosto 28, igbabalik an implementasyon han General Community Quarantine ha bug-os nga Sinirangan Bisayas subay na gihapon han hangyo han Regional Inter-Agency Task Force nga gintangdu-an han National IATF.

An mas istrikto nga GCQ in mahagos hin duha ka semana. An rehiyon in haros duha na ka bulan nga iginpailarum ha Modified GCQ pero han nag-agi nga tulo ka semana waray na preno an paglobo han mga nagkakatatapnan han virus ug kadam-an han nagpopositibo in pinaagi han Local ngan Community Transmission.

Nagpahayag hi DOH Regional Director Minerva Molon aada na ha critical zone an mga Intensive Care Units ngan ukupado na an mga hospital beds. Dida hini nga duha ka semana nga GCQ, magkakaada hin panahon an DOH ug an mga LGUs nga maghan-ay hin mga plano ngan pitad basi deri na magpadayon an pagtikadamo han kaso.

Umabot na ha 2,600 an mga Covid Cases han rehiyon kataliwan la nga mahidugang kakulop an 126 nga mga nagpositibo. Dida hini, 1536 (59%) an naka-recover ngan 1,047 an Active Cases. Mayda liwat duha nga namatay sanglit 18 na nga Covid Patients han rehiyon an tumalikod ha kadayunan. Umabot na 275 an mga Health Personnel nga nadarahigan han kagaw.

An probinsya han Samar naka-ensima na yana han Leyte han ihap han gidadamu-i nga natapnan. 952 na an nagpositibo ha Samar ngan nangunguna didto an kapital nga syudad han Catbalogan nga mayda 370 nga kaso ug nahideklarar an Community Transmission hini nga syudad. Kakulop, may bag-o nga 31 nga natapnan nga mga Catbaloganon.

Ha luyo nga bahin, an Leyte in mayda naman 863 nga nagpositibo.

Ikatulo dida han listahan amo an Tacloban City pinaagi hin 290 nga kaso. Kakulop mayda 43 nga bag-o nga nagkatatapnan dida han nasabi nga syudad ngan haros tanan pinaagi han Local Transmission.

An Southern Leyte in mayda 206, Ormoc-109, Biliran-72, Northern Samar-67 ngan Eastern Samar.41. #