Isumat.com/7:27AM, September 11, 2020

Padayon an pagsaka han mga nagkakatambalan tikang han Covid-19 ha Eastern Visayas. Dida han gibabag-uhi nga update han DOH Regional Office, 153 an naka-recover.

Tungod hini, umabot na ha 2,809 an Total Recoveries han rehiyon. Ini nga ihap in 77% han 3,634 nga nagkatatapnan han ginkakahdlukan nga kagaw. Iginreport gihapon han DOH nga 33 na an namatay nga Covid Patients ha Sinirangan Bisayas.

Lakip dida han anunsyo han DOH an 353 nga nagkatatapnan nga Health Workers. Pero iginkakalipay naman han buhatan nga porlomenos 300 ha ira an nakatalwas na ug an iba in bumalik na ha pagserbisyo.

Dida han pasamwak han ahensya kakulop, Setyembre 10, an Tacloban City an nagsamool han gidadamu-i nga nagpositibo kay 25 ini katawo. Ha kabug-usan 602 na nga Taclobanon an nagpositibo han virus ngan lapos katunga hini an nagpaka-recover.

Hi City Mayor Alfred Romualdez in nagmando ha mga barangay kapitan nga maghimo hin mga task force ha ira nasasakupan nga lugar nga magbabantay han mga residente agud kalimitaran an gi-os han mga mulopyo. Gin-aghat gihapon niya an mga kapitanes nga kun mahihimo, deri magpasulod hin iba nga tawo ha ira barangay kun deri gud kinahanglanon. #