Isumat.com/8:19AM, June 12, 2020
Bumalik ha piyod han balaud in usa nga mimbero han New Peoples’ Army didto ha Northern Samar.
Iginreport han Northern Samar Police Provincial Office nga sumurender hi Nilo Tonog, alias Nonoy ngan Bunso, 27 anyos, residente han Brgy Paguiti, Lope de Vega, Northern Samar.
Subay han impormasyon tikang ha PNP, hi Tonog in miembro han kanan NPA Front Committee 2 Sandatahang Unit Propaganda tikang pa han tuig 2012.
Dida han iya pagsurender, nagpahayag hi Tonog nga deri na niya akos karawaton an pagbinuwa ngan pangowat han kagi-usan nga komunista. Iya pa iginsumat nga deri matadong an ginbibinuhat han iya anay mga ka-usa nga pagpinanhadlukon ngan pagsamok ha mga baryuhanon.
Igintubyan gihapon han rebelde in usa nga kalibre 45 nga pistola upod in mga bala.
Ginseguro naman han militar nga matatagamtaman ni Tonog an ayuda han gobyerno pinaagi han E-CLIP Program para han mga nasurender nga mga rebelde. # (KEVIN SIOSANA)
