(Photos by 802nd Infantry Brigade, PA)

Isumat.com/7:28AM, September 25, 2020

Nahulog ha kamot han balaud in kaapi han New Peoples Army (NPA) didto ha Southern Leyte nga maiha na nga ginpipinamiling tungod hin kaso nga murder.

Dida han report han 802nd Infantry (Peerless)Brigade han Philippine Army, nadakop hi Renato Rodriguez hadton Setyembre 23, 2020 ha Brgy Calintaan, Anahawan, Southern Leyte. An mga elemento han AFP ngan PNP an nagburublig basi ma-aresto hi Rodriguez, alias Alex.

Pinaagi han warrant of arrest tungod han mga kaso nga murder ngan frustrated murder nga iginpalusad han RTC-Branch 26 ha San Juan, Southern Leyte, ginsikmit han mga otoridad hi Rodriguez.

An shotgun ngan mga bala nga nakumpiskar tikang kan Rodriguez

An mga kaso nga iya gin-aatubang in kasumpay han iya paghidabi hin bayolente nga mga aktibidad han walhon nga grupo kontra han militar ngan inosente nga mga sibilyan hadton dekada 90.

Iginpahayag han mga otoridad ngahi Rodriguez in anay kaapi han Southern Leyte Front Committee han CPP-NPA nga naghimo hin operasyon kontra han gobyerno ha mga parte han Leyte ngan Southern Leyte.

Nakumpiskar tikang kan Rodriguez in usa nga shotgun, mga bala ngan matarom nga hinganiban. #