Isumat.com/Hunyo 2, 2021

Usa nga rebelde nga kumunista nga naatubang hin kaso nga murder an na-aresto, samtang usa naman nga kaapi han Philippine Army an nasamad dida hin magkalain nga insidente ha Eastern Samar ngan Samar hadin nakalabay nga adlaw.

Dida han report han Eastern Samar PNP Office, ginkilala an nadakop nga hi Mario Delmonte, 50 anyos, inasaw-an ngan residente han Brgy Pinanag-an, Borongan City. Hi Delmonte in gin-aalegar nga lider han Squad 2 Front Committee SouthEast Sub-Regional Committee han CPP-NPA Eastern Visayas nga nagi-os ha Borongan City, Llorente, Maydolong ngan Balangkayan, Eastern Samar.

An suspetsado in gintutudlok nga kaapi han grupo han mga terorista nga nag-ambush han mga pulis nga kaapi han 1st Eastern Samar Police Mobile Force Company. Natabo ini nga panggama hadton Disyembre 2019 kun diin usa nga pulis an namatay ngan tulo an nasamad. Namatay gihapon dida han insidente in upat nga sibilyan nga naagi la dida han lugar han ambush ha Brgy Libuton, Borongan.

H Delmonte in naatubang gihapon hin kaso nga panikas ngan tulo nga kaso hin attempted murder. An pagdakop kan Delmonte in natabo Hunyo 1 ha Borongan pinaagi han mga kaapi han PNP Provincial Office, Borongan City PNP, CIDG Field Unit ngan AFP.

Ha iba naman nga panhitabo, nag-antos hin kasamdan in usa nga sundalo ngan gintotoohan nga mayda nagka-iigo hin bala ha panig han mga rebelde dida hin engkwentro kakulop ha San Jose de Buan, Samar.

Subay han impormasyon tikang ha 8th Infantry Division han Philippine Army, an mga tropa han 87th Infantry Battalion ngan CAFGU in naghihimo hin security patrol ha Brgy Can-aponte han igkasurapo hira hin lima nga mga rebelde.

Katapos han 20 minutos nga pinusilay, usa nga sundalo an nasamad, samtang gintotoohan nga mayda liwat naigo ha panig han mga kumunista tungod han mga turo hin dugo ha dalan nga ira gin-agi-an han pag-eskapo.

Ha atubangan hini nga pamnhitabo, gin-aghat naman ni LtCol Reynaldo Balido Jr, an namumuno han batalyon, nga sumurender an nasamaran nga mga rebelde basi makatagamtam hira han kaangayan nga pagtambal.

Nagsering pa hi Balido nga an mga tropa han gobyerno in nakadestino didto han lugar basi tagan hin proteksyon an mga sibilyan kontra han pangikil han mga rebelde ngan maghatag hin seguridad para han mga personales nga nagdudumara hin mga proyekto para han kaupayan han mga baryohanon. #