An suspetsado nga hi Henry Estrella Andres..

Isumat.com/7:35AM, September 05, 2020

Pira ka oras katapos matad-an an patay nga lawas han 6-anyos nga babayehay ha Brgy Limbuhan Guti, Tanauan, Leyte, na-aresto han kapulisan an suspetsado nga nagbuhat han makangingirhat nga krimen.

Subay han pahayag ni P/Captain Dinky Boy Bardillon, hepe han Tanauan PNP, an suspetsado in ginkilala nga hi Henry Estrella Andres alias Hero, 23 anyos, ug patod igsyapa han tatay han biktima.

Nagsering hi Bardillon nga gin-angkon na ni Andres nga hiya an naghimo han krimen. Dida han pasado alas 5 han aga hadton Setyembre 3, nakit-an han suspetsado nga nagmamata na an biktima. Iya ini igin-upod ngan ginpalitan hin pagkaon ngan gindara ha masighot nga lugar han barangay ngan didto ginlugos. Kataliwan hini, iya gintilo an babayehay tobtob han kamatay.

Hinsabutan gihapon nga mayda personal nga away ha butnga han suspetsado ug han nanay han biktima.

An suspetsado nga nadakop kakulop in sasampaan hin kaso nga Rape with Homecide.

Hadton Setyembre 3, nawara an biktima ngan pagkabuwas han maagahon, nadiskubre an iya patay nga lawas. Pira la ka oras, natudlok han mga otoridad an suspetsado ngan kadagmitan nga gin-aresto. #