Isumat.com/6:38AM, Marso 5, 2021

An numero uno ka-istrikto nga lugar ha pagpasunod han Health Protocols amo yana an nagpahukal han patakaran ha pagbiyahe.

An Inter-Agency Task Force han Ormoc City an nagdesisyon nga tanggalon na an damo nga mga papeles ngan iba pa nga rekisitos nga gin-aaro ha mga biyahedor nga nasulod o nagawas han syudad.

Subay han impormasyon tikang ha Ormoc City Government, an ginkikinahanglan pagsulod han syudad amo la an Ormoc QR Code ngan pag-check han temperatura. Para han waray pa QR Code han syudad, kinahanglan kumuha kamo hini pinaagi han pag-rehistro ha safeormoc.com/register.php

Iginpapahinumdom han Ormoc IATF nga an pagpa-register han ira QR Code in makukuha pinaagi hin mobile data o naka konektar ha wifi an internet. Deri ka makaka-rehistro kun Free FB an gagamiton.

Ginsasagdunan gihapon an mga biyahedor nga deri maghatag hin deri tinood nga impormasyon ha pagpa-rehistro ngan deri igpagamait ha iba nga tawo an QR Code.

Magpapabilin naman an implementasyon han minimum health standards sugad han pagsul-ot han face mask, face shield ngan physical distancing.

Ginklaro naman han Ormoc IATF nga kun magdamo an mga positibo han Covid-19 ha ira lugar, kadagmitan nga igbabalik an iginpatuman hadto nga istrikto nga guidelines. #