Isumat.com/2:30PM, June 8, 2020

Ha panuyo nga sumunod gud an katawhan han Tacloban sugad man an mga mulopyo nga napakanhi han syudad, an City Government in nagpakurukusog pa han pwersa nga maghihimo han panakop han deri nagtutuman han ordinansa kasumpay han pagsul-ot han face mask ngan pagderi pagsigarilyo ha pampubliko nga lugar.

Sumala han report han Tacloban Information Office, sobra 300 nga mga personales han City Government an kadugangan nga igpapasarang ha bug-os nga syudad para han istrikto nga implementasyon han City Ordinance 2020-14-07. Ini nga mga personales in nagkatitirok yana nga adlaw kun diin iginpa-ilarum hira han pagtutdo han guidelines ngan mga estratehiya ha pagpatuman han ordinansa.

Mabulig hira han COVID-19 Monitoring Team basi maseguro nga an publiko in magsusunod gud han pagsul-ot han face mask ngan iba pa nga health protocols. Iginlalarang han ordinansa nga kinahanglan naka-face mask an bisan hin-o nga magawas han balay, magbibiyahe, masulod hin establisemento ngan pampubliko nga lugar.

An makakatalapas hini nga ordinansa in mumultahan hin tikang Mil Pesos tobtob 5 Mil pesos ngan may lakip nga community service.

Hi Mayor Alfred Romualdez in pira na ka beses nga nag-inutro-utro pagpahinumdom ha publiko nga gamiton gud an face mask kun magawas ha ira kabablayan. Ha atubangan hini nga kamanduan, na-obserbaran nga damo la gihapon an nagpipinasaway ngan deri nasunod han ordinansa.

Hapagkayana, an Tacloban City in mayda duha nga positibo han COVID-19. An 29 anyos nga OFW in aada pa ha Isolation, pero puede na maka-uli kay nag negatibo na an iya repeat testing, samtang an 31 anyos nga Balik-Taclobanon in naka-admit ha hospital pero maupay an iya panlawas. # (KEVIN SIOSANA)