Isumat.com/3:57PM, July 27, 2020
Nagkabigitay in duha nga kapulisan nagresulta han kamatayon han usa ha ira didto ha kampo han 124th Special Action Company, Brgy Guindapunan, Catbalogan City, Samar.
Subay han inisyal nga imbestigasyon, nahitabo ini nga pamusil pasado alas 2 han maagahon, Hulyo 27. Ginkilala an biktima nga hi Patrolman Lloyd Imano, 32 anyos, inasaw-an, residente han Koronadal City; samtang an suspetsado hi Patrolman Eduardo dela Cruz, 33 anyos, waray asawa, residente han Taguig City. An biktima ug an suspetsado in parehas nakadestino han nasabi nga unit han PNP ha Samar.
Nagpapakita an report nga hi Imano ngan Dela Cruz in nagkaada hin mapaso nga argumento. An biktima in nag-akusar nga hi Dela Cruz an nagrekomendar nga magpa-ilarum hin “Sureshock Training” an biktima. Katapos han ira balingkutay, hi Imano in sumulod han bunkhouse ni Patrolman Alvin Migrino, ug han iya pag gawas tikang han bunkhouse, pinusil hiya hin pira ka beses han suspetsado.
Sumala kan Dela Cruz, kasering niya nga kumuha hin pusil hi Imano didto han bunkhouse, sanglit iya ini gin-unahan pagpusila.
Gindara ha Samar Provincial Hospital hi Imano pero igindeklarar nga dead on arrival han mga doktor.
Buluntaryo naman nga sumurender an suspetsado ngadto han ira opisyal han kampo ngan igintubyan an iya 9mm Caliber pistol nga gingamit han krimen. An suspetsado in gindara ha Catbalogan PNP Station para han kaangayan nga disposisyon. An Catbalogan PNP in nagsampa hin kaso nga murder kontra han suspetsado.
An Sureshock Training in espesyal nga kurso han pinili nga mga tinubyanan han balaud. Dida hini nga training, ginhahag-id an mga otoridad ha pakig-away kontra han mga terorista ha urban areas. #
