Isumat.com/7:16AM, December 21, 2020
Usa nga pulis an namatay dida hin shooting incident, samtang usa naman nga kaapi han CAFGU an na-aresto tungod hin carnapping ha magkalain nga panhitabo ha Ormoc City ngan Eastern Samar.
Binawi-an hin kinabuhi hi PCpl Ruffy Pepito han pusilon hin waray hikilal-i nga suspetsado pasado alas 8 han gab-i, Disyembre 19, ha Brgy Libertad, Ormoc City. An biktima in may ginpapalit ha usa nga tindahan harani la han ira balay didto han mao nga barangay han tigda la may umabot nga itom nga SUV. Humaw-as dayon an suspetsado ngan ginpanmumusil hi Pepito.
An 38-anyos nga biktima in nakadestino ha Silago, Southern Leyte Municipal Police Office. Tobtob yana padayon an imbestigasyon han kapulisan basi matudlok an nagpapaluyo ngan motibo han krimen.
Ha luyo nga bahin, an mga kaapi han Regional Highway Patrol Group an nag-aresto kan Rowie Mugas, 35-anyos ngan residente han Brgy Can-ilaw-Can-avid, Eastern Samar dara hin kaso nga carnapping.
Sumala han report han HPG, an Regional Trial Court-Borongan in nagpagawas hin Warrant of Arrest kontra kan Mugas tungod han pakatalapas han Anti-Carnapping Law. Hiya in na-aresto ha Brgy Lalawigan, Borongan City.
Subay pa han impormasyon an akusado in miembro han unit han CAFGU nga nakadestino yana ha Brgy Cantaba, Sta Rita, Samar. #
