Isumat.com/Agosto 20, 2021
Nagka-aawat an kinabuhi hin usa nga pulis ngan kapitan hin barangay ha magkalain nga madugo nga mga insidente kakulop, Agosto 19, 2021 ha Northern Samar.
Kakulop han aga, an mga tropa han Regional 805th Maneuver Company han PNP Regional Mobile Force in nagpapatrolya ha Brgy Geparayan, Silvino Lubos, N. Samar han igkasurapo hira hin porloemenos napulo nga mga miembro han NPA.
Subay han impormasyon, nagkaada hin 10 minutos nga agway ha butnga han duha nga panig kun diin naigo hi Patrolman Mario Caramol Jr nagresulta han iya kamatay. Hi Caramol in 31 anyos ngan residente han Brgy Salvacion, Dulag, Leyte.
Tulo han mga suspetsado in nakilal-an han mga otoridad nga hira Jasper Jarito alyas Basoy, Rio Albino alyas Dodo ngan Acer Turcido alyas Ar-ar. Ini nga mga suspetsado in nakatalaan sampaan hin kaso han mga tinubyanan han balaud.
Iginpatapod naman han liderato han PNP Regional Office nga deri hira maundang paghalpat han mga suspetsado basi katagan hin hustisya an biktima.
Ha iba naman nga panhitabo, hi Brgy Kapitan Nilo Loyugoy han Brgy Victory, Las Navas, Northern Samar in ginpatay hin lima nga mga suspetsado.
Subay han inisyal nga imbestigasyon, an 53-anyos nga biktima in nakikig-istorya han iya mga amyaw han magkaabot in lima nga armado nga kalalakin-an.
Nagsering an mga gintatahapan nga karuyag nira makighimangraw han kapitan. Paghagos hin pira ka minutos, ginpa-uranan hin bala an biktima han mga suspetsado nga amo an hinungdan han iya kamatay.
Kumalagiw naman dayon an mga suspetsado katapos han krimen. An kapulisan in padayon nag-iimbestigar han panhitabo basi masabtan an motibo ug an pangilal-an han mga suspetsado. #
