Isumat.com/Enero 11, 2022

Namatay in usa nga pulis han paarakan hiya hin bala hin pira nga mga suspetsado kakulop han udto (Enero 10, 2022) ha Brgy Calinganan, Catubig, Northern Samar.

An biktima in ginkilala nga hi Staff Sgt Joerel Pajac, 39 anyos ngan residente han nasabi nga lugar. Hiya in naka-assign ha Northern Samar Police Intelligence Unit.

Subay han inisyal nga imbestigasyon, hi Pajac in tikang han iya umhanan ngan ngan tiuli na unta sakay han iya motorboat. Han tihaw-as na hiya dida han pantalan han barangay, porlomenos upat nga suspetsado an nagpa-arak hin bala ha iya.

Nakahimo pa an biktima nga makalukso ngadto han salog ha paningkamot nga makasalbar, pero padayon hin pagpusil ha iya an waray panhikilal-i nga mga gintatahapan nga kadagmitan kumalagiw katapos han insidente.

An mga residente han lugar in nanmiling han biktima didto han salog ngan humagos pa in usa ka oras antis ini nira natad-an. Nag-antos hin damo nga igo hin bala an sarhento hinungdan han iya kamatay.

An service firearm ni Pajac in waray katad-i ngan gintotoohan nga nahulog ngadto han salog dida han panhitabo.

30 nga mga basiyo hin kalibre 45 nga pusil an nakuha han mga imbestigador dida han lugar han krimen. #