Isumat.com/9:05AM, June 10, 2020
Gindakop han mga kapulisan an ira igkasi pulis nga ginsalawdan hin reklamo nga sexual harasssment hin usa nga babaye.
Dida han record han police blotter ha Abucay PNP Station, an gin-aresto in ginkilala ngahi Patrolman Ramir Araos, may igo nga pangidaron ngan taga Maydolong, Eastern Samar. Waray mahisumat kun diin o ano nga unit han PNP hiya naka-destino.
Usa nga babaye ngahi alias “Emily” nga residente han Palanog, Tacloban City an nag reklamo ha Criminal Investigation and Detection Group (CIDG) tungod han pakasupak ni Araos han Section 12 han Republica Acta 11313 kasumpay han Gender-Based On-Line Sexual Harassment.
An CIDG, Tacloban PNP Intelligence Unit ug mga operatiba han Abucay Station an nagporma hin grupo paghalpat han suspetsado ug didto ha Brgy Libertad, Tacloban ira nasikmit hi Araos. Nakumpiskar tikang ha iya in usa nga cellphone ngan motorsiklo.
Gindara ngan ginkustudiya han CIDG an suspetsado ngan gin-aandam pa an kaangayan nga disposisyon ha iya.
Waray gihapon mahisumat ha blotter kun ano an natabo o an detalye han gin-aalegar nga on-line sexual harassment. # (KEVIN SIOSANA)
