Isumat.com/Hulyo 12, 2021
Mayda ba preso ha Abuyog Penal Colony nga amo iton direktor hin operasyon han iligal nga droga?
Mabibisto ini kun tinood o buwa kun pag-iimbestigaron hin tinooray han mga otoridad an iginbuyagyag hin usa nga drug suspect nga mayda detenido didto han karsel nga amo an nagkokontrol o nagdidikta kun diin o hin-o an babagsakan han droga.
Dida han gindumara nga buy-bust operation han Leyte PNP Drug Enforcment Unit ngan Abuyog PNP, Hulyo 11, ha Brgy Bunga han mao nga bungto, nadakop an suspetsado nga hi Epifanio Almendra, residente han Brgy Victoria. Hi Almendra in napreso anay pero nakatagamtam hin parole.
Narekupo tikang han suspetsado in pito ka sachet hin gintotoohan nga shabu kantidad hin 7 Mil pesos.
Nagsumat hi Almendra ha mga imbestigador nga an iya trabaho amo an panmiling han tawo nga lalandingan han droga nga ginkokontrol hin usa nga indibiduwal nga detenido yana ha Abuyog Penal Colony.
An gintatahapan in nakapaslak yana ha Abuyog PNP Detencion Facility ngan nakatalaan sampaan han kaangayan nga mga kaso. #
