Isumat.com/ Disyembre 24, 2022

Para han Security Cluster han gobyerno, patay na an mag-asawa nga hira Benito ngan Wilma Tiamzon, an gin tutudlok nga higtaas nga lideres han kagi-usan kumunismo ha nasud.

Iginpahayag ni National Intelligence Coordinating Agency (NICA) Regional Director Eustacio Bacabac nga positibo gud nga naawat an kinabuhi nira Tiamzon dida han engkwentro kontra militar hadton maagahon han Agosto 22, 2022 ha Catbalogan City, Samar.

Durante han Media Forum ha Hotel de Fides, iginsumat ni Bacabac nga mismo an mga miembro han Task Force nga iginkasurapo han grupo nira Tiamzon an nagseguro nga patay na an duha nga NPA leaders. Hi Benito amo an cunsultant han National Democratic Front ngan miembro han Executive Committee, samtang hi Wilma an Secretary General han Executive Committee.

Nag-esplikar hi Bacabac nga dida han nasabi nga engkwentro ha kadagatan, bumuto an sinasakyan nga motorboat han mga rebelde ngan nagbublag an mga parte han lawas han mga sakay hini. Kadam-an nga mga parte hin lawas hin tawo an nanhisampig ha mga kabaybayunan didto han nasabi nga dapit katapos hin pira ka adlaw.

Hi Bacabac in nagsering pa nga an mga paryente ni Benito in deri naruruyag nga igpa-ilarum ha DNA Test an mga parte han lawas basi deri makumpirmar nga patay na an duha nga lideres han walhon nga grupo. Amo in an rason nga waray DNA testing kay deri man nasugot an pamilya han mga biktima, sering pa han opisyal.

Igindig-on ni Bacabac nga waray duda an mga meimbro han Task Force nga nagkamamatay dida han insidente hira Tiamzon.

Tobtob yana, an kagi-usan kumunista in nagmimiringaw ngan waray iginpapakita nga pruweba nga buhi pa hira Benito ngan Wilma, dugang pa ni Bacabac.

Dako an pagtoo han mga tropa han gobyerno nga maluya na an pwersa han CPP-NPA-NDF ha Eastern Visayas ngan ha bug-os nga nasud tungod han kamatay nira Benito ngan Wilma, ngan han pagtalikod ha kadayunan han Founding Chairman han partido kuminista nga hi Jose Maria Sison didto ha Netherlands han nakalabay nga semana.#