Misis pinatay mahitungod hin selos

JARO, LEYTE – Grabe nga selos an guinkikit-an nga motibo ha pagpatay han 48 anyos nga lalaki ha iya naman live in partner ha Barangay Mag-Aso bungto han Jaro, Leyte.

Subay ha blotter nagkamay-ada hin mapaso nga dikusyonan an duha tungod han text messages nga nabasahan han suspek nga hi Alidio Perdones tikang han cellphone han iya live-in partner nga hi Ailyn Aleleng.

Tigda naman nga kumuha hin sundang an suspek ngan ginpaninigbas an biktima ha magkadurudilain nga parte han iya lawas.

Dayon naman nga gindara an biktima ha ospital pero guindeklara ini nga dead on arrival han attending physician.

Hapagkayana, nadakop na an suspek ngan guinpasakaan na hin kaso nga murder.


Drug pusher dakop ha Kanangga

KANANGA, LEYTE – Guin-aresto an usa nga drug pusher ha Poblacion Kanagga, Leyte pinaagi han Oplan Paglalansag ngan Oplan Big Berta han Criminal Investigation and Detection Group (CIDG).

Guinkilala an suspek nga hi Michael Cabiling, 32 anyos nga guinkokonsidera nga Top 3 Drug Pusher ha 4th District han Leyte.

Nakuha han mga otoridad ha suspek an usa nga caliber .357 Revolver, usa nga cal. 45 pistol, 1 ka sachet hin white crystalline nga guintutuuhan nga shabu nga may kabug-aton nga 63 gramo nga may market value maabot hin 300 mil ngada 500 mil pesos.

Hapagkayana naatubang hin kaso pinaagi han Violation of RA 10591 o Illegal Possesions of Firearms ngan RA 9165 Anti Illegal Drugs Act.


Secretaryo han Merida Mayor guin-pusil patay

MERIDA, LEYTE – Kritikal pa ngada yana an Secretaryo han Mayor ha bungto han Merida Leyte mahuman ini nga pusilon ha ulo hin waray kakilal-i nga suspek samtang nga nagpapahuway ha iya naman pwesto ha public market.

Guinkilala an biktima nga hi Remegio Mopon Jr. 35 anyos, may asawa, bag-o nga guintudlok komo Secretaryo ni Mayor Antonio Martinez, ngan residente ha Poblacion ha lugar han Merida Leyte.

Sumala kan Hepe han Merdida Police Station Eduardo Moto Sattore, nga hubog hubog pa an biktima kaupod an iya naman mga kasangkayan nga mga bayot dida han tigda nala hini daupon ngan pagpusilon han waray pa kakikilal-e nga suspek.

Nagpapabilin pa ha Hospital an biktima samtang padayun pa nga guin-iimbestigahan han mga kapulisan kun anu an motibo ngan hin-o an responsable han mao nga panhitabo.


Singaporean National biktima hin snatching

TACLOBAN CITY- Na biktima hin panrabnot an usa nga 28 anyos nga langyawanon.

An tagreklamo in nakilala nga hi Chi Wei Lee, 28 anyos, Singaporean National.

Ha report han kapulisan, nagawas nga nagbabaktas an biktima ha may ligid han kalsada ha may Paseo De Legaspi nga dapit han syudad han Tacloban han tigda nala nga pagrabnuton an travelling bag nga dara hini hin 2 nga waray makilala nga mga suspetsado sakay hin single nga motorsiklo.

Nadara an mga higamit han biktima sugad han cellphone, nga nakantidad 45 mil pesos, laptop, ngan 8 mil pesos nga cash.


Lalaki nakit-an patay ha salod hin baloto

GANDARA SAMAR – Usa nga lalaki an nabilngan nga patay ha usa nga sakayan pandagat ha lugar han Brgy. San Luis, Pagsangha ha Probinsya han Samar dida han nakalabay nga adlaw.

Guinkilala ini nga biktima nga hi Pedro Avila, 63 anyos, usa nga purupangisda ngan residente han Brgy. Tambongan, Gandara Samar.

Subay ha report han mga kapulisan nga an biktima in nakag-angklun hin samad ha iya naman wala nga kiray, wala nga kamut ngan ha liug.

Nabaruan naman mahuman an autopsy examination nga hinungdan han kamatayun han biktima in mahitungod han Cardiac arrest.


Patay nga lawas hin lalaki nagkit-an ha tubuhan

ORMOC CITY – Nakit-an an usa nga patay nga lawas hin lalaki ha usa nga tubuhan ha Brgy Sumangga ha siyudad han Ormoc.

Subay ha report han Ormoc Police Station guinbabana-bana nga 19 ngada 21 anyos an natad-an nga patay, ngan damo an binun-an ha magkadurudilain nga parte han iya lawas.

Guindara naman han Ormoc City Health Office an patay nga lawas para magpailarum hin post mortem examination.

Waray panaman mabaru-e kun anu an motibo ha pagpatay han biktima nga waray pa pangilal-an.