Isumat.com/9:15AM, June 16, 2020

Gin-aandam na yana an kaso nga posible igsalawad kontra han PCol Joel Ana dara han alegasyon nga pagtalapas han opisyal han patakaran kasumpay han COVID-19 ha Borongan City, Eastern Samar.

Hi City Mayor Jose Ivan Agda in nagseguro hin kaangayan nga aksyon ngan upod hini an pag-istudyo han kaso nga igsasampa kontra kan Ana. An opisyal han PNP in nagderetso daw dida han checkpoint ha Brgy Locsoon ngan waray umagi han inspection dida han pasado alas 7 han gab-i hadin Sabado.

Iginreport han Borongan City PNP nga waray manginano han checkpoint an van nga sinasakyan ni Ana nga may escort nga duha nga motorsiklo ug dumeretso hira pagsulod han syudad.

Subay han nahikay nga impormasyon han Isumat.com, hi Ana in opisyal han PNP Highway Patrol Group ngan naka-assign ha Logistics Division. Dida han Sabado, umabot tikang ha Manila an opisyal ha Tacloban basi mag-deliver hin mga ekipahis para han HPG-Region 8.

Komo usa nga Boronganon, nagdesisyon hi Ana nga pumakadto anay ha iya lugar basi pasyadahan an iya pamilya. Dida hini nga iya pagkadto ha Borongan, natabo ini nga insidente. An surok han impormasyon in nagsumat pa nga pira la ka oras hi Ana didto han ira balay ha Borongan ngan lumakat na tibalik ha Manila.

An opisyal in miembro han Class 98 han Philippine National Police Academy. #