Isumat.com/Hulyo 16, 2021

Makaka-agom gihapon an Sinirangan Bisayas han mga bakuna nga gintutudlok nga mas epiktibo pagsurapo han Covid-19.

Hi Dr. Exuperia Sabalberino, Director han DOH-Regional Office, an nagpasamwak nga namimintana ini nga posibilidad tungod han malinangpuson nga test run han Pfizer didto ha Ormoc City nga gindumara hadin nag-agi nga semana.

Tungod hini, nag-aandam an ira opisina pagkarawat hin daru-damo nga alokasyon han Pfizer vaccines kay ira iginrekomendar ha DOH Central Office nga kamalunan an Region 8 han nasabi nga bakuna kay nagin malinangpuson man an pilot testing ha Ormoc.

Nagsering hi Sabalberino, an DOH Regional Office in mayda Ultra-Low Freezer kun diin puede paghipuson an mao nga bakuna antis igturok ha katawhan.

Na-obserbaran nga kadam-an han katawhan in naghihingyap nga an Pfizer ug an mas kilalado nga mga brands an igtuturok ha ira dara han mas hitaas nga efficacy rate hini kun igkukumparar ha Sinovac.

Igindugang pa ni Sabalberino nga ha maabot nga mga bulan, matatagan gihapon an rehiyon han Moderna, Sputnik V, ngan Johnson brands.

An Sputnik V nga hinimo ha Russia in gintestingan na gihapon ha Ormoc City. #