(Photo by pep.ph)

Isumat.com/7:16AM, Enero 26, 2021

Gintugutan na han National Bureau of Investigation (NBI) hi Jake Esteron nga maka-uli ngadto ha Northern Samar katapos maghatag hiya hin mga testemonya kasumpay han imbestigasyon han misteryoso nga kamatay han flight attendant nga hi Christine Dacera hadton Enero 1 ha usa nga hotel ha Makati City.

Kun manunumduman, hi Esteron in ginkuha han NBI denhi ha aton dapit ngan gindara ha Manila tungod kay nahilakip hiya han mga Persons-of-Interest dida han nasabi nga kaso. Hi Esteron in usa han mga bisita didto han Room 2207 han hotel kun diin nagbalik-balik pagsulod hi Dacera nga naka-check-in ha Room 2209 upod han iya kasangkayan.

Hi Dacera in natad-an ha bathtub nga waray na kinabuhi ngan nagin kontrobersyal an panhitabo tungod han pahayag han PNP nga may natabo nga panlugos ugsa mamatay an flight attendant.

Nagsering hi Esteron nga deri niya kilala hi Dacera ngan ginkumbida la hiya hin iya sangkay didto han kaluyo nga kwarto. Nag-asoy pa hi Esteron nga waray niya nakit-an nga iligal nga droga didto han karisyuhan ngan mga irimnon nga makahurubog la an ira gin-irignom.

Nagsumat pa an Nortehanon nga marisyo an ira pagtapo han New Year kay nagkaada pa ngani hira hin parlor games.

Umabot hiya ngadto han hotel banda alas 10 han Disyembre 31 ngan lumakat liwat hiya alas 5 han maagahon, Enero 1.

Naglalaum hi Esteron nga masosolbar na ini nga panhitabo tungod kay apektado an personal niya nga kinabuhi.

An PNP in nagtudlok hi 13 nga Persons-of-Interest hini nga panhitabo. Ginbuhi-an na gihapon han mga otoridad an naha-una nga mga gin-imbestigar tungod kay iginbalik ha pulisya an kaso tikang ha DOJ kay kulang an mga ebidensya ngan kinahanglan pa hin hag-id nga imbestigasyon.

Hi Esteron in residente han Brgy Dalakit, Catarman, Northern Samar. Hiya in part-time model ngan artista. Nagin kaparte na hiya hin pira nga mga salida ha telebisyon. #