Isumat.com/9:26AM, Pebrero 8, 2021
Paglapos han adlaw han mga kasingkasing, kinahanglan bumalik na ha panig han gobyerno an mga rebelde nga New Peoples Army sugad man an ira supporters ha Matuguinao, Samar kay kun deri nira ini buhaton, igsasampa na an kaangayan nga mga kaso kontra ha ira.
Ini an iginmando han Mayor han bungto, Aran Boler, ug ni Lt. Col. Jasper Justito Pecson, Commanding Officer han Philippine Army 19th Infantry Battalion. Sumala ha ira, an deadline han pagsurender in Pebrero 15, 2021. Katapos hini nga petsa, igsasalawad na an mga reklamo ha korte kontra han natutungdan nga mga indibiduwal.
Gintagan hin duon ni Boler nga deri makakaplagan an kauswagan ha ira lugar kun magpapadayon an kasamok tungod han insurhensiya. Sering pa han alkalde, an presensya han mga rebelde nga terorista in nagdudurot hin kahadlok ha mga bungtuhanon sanglit deri nagkakaada hin mamurayaw nga panginabuhi.
Gintatarget ni Boler nga kun deri man masolbar an insurhensiya ha iya bungto yana nga tuig, kinahanglan matapos na ini hiton 2022.
Hira Boler ngan Pecson in nakighimangraw han 20 nga mga kapitanes del barangay han bungto hadin nag-agi nga semana kun diin ira igindig-on nga igpasamwak an deadline ngadto han mga rebelde ngan mga nagsusuporta han kumunismo nga kagi-usan.
Ginklaro naman ni Boler nga an iya kamanduan ha mga barangay chairmen amo an pagkondenar han maraot nga binuhatan ngan deri pakigpusilay ha mga rebelde.
Kadam-an nga mga opisyales han tay-aw nga mga barangay in aadto na na-ukoy ha poblacion han bungto tungod han kahadlok han mga rebelde, pahayag pa han report tikang ha PNP Regional Office.
Kadam-an han mga barangay dida han bungto in nagdeklarar na han mga rebelde komo “persona-non-grata.”#
