Isumat.com/Hunyo 9, 2022
An iligal nga paagi hin pagpakabuhi an nagin mitsa han kaanaw hin kinabuhi hin usa nga parupangisda ngan kasamad han iya duha nga kaupdanan ha Sto Nino, Samar han mabuthan hira hin dinamita samtang nananagat ha kalalawdan hadton Hunyo 7, 2022.
Dida han imbestigasyon, ginkilala an namatay nga hi Emeliano Davila, 40 anyos; samtang an nag-antos hin karamtan ha lawas amo hira Rolan Davila ngan Jorge Davila, may mga insakto nga pangidaron, ngan kapapturan ni Emeliano.
An tulo nga mga biktima in mga residente han Brgy Ilijan han nasabi nga bungto.
An sinindihan nga dinamita in iglalabay na unta ni Emeliano ha kadagatan han bumuto ini dida han iya kamot hinungdan han iya kamatay dida han lugar han insidente ngan kasamad han iya mga kaupod.
An duha nga nakatalwas in nadara ngan gintatambal na yana ha Calbayog District Hospital.
Hadton Enero hini nga tuig, usa nga barangay kapitan ha Zumarraga, Samar an nasamad gihapon han mabuthan hin dinamita nga ira gingagamit han panagat.
Samtang, han Setyembre 2021, duha nga mangirisda an nagkamamatay han mabuthan hin dinamita ha Brgy Malajog, Calbayog City. #
