Isumat.com/7:41AM, October 29, 2020
Ngatanan nga residente ha Northern Samar kinahanglan nakasul-ot hin face mask ngan face shield kun magawas ha balay ngan mapakadto ha pampubliko nga lugar.
Ini an kamanduan ni Governor Edwin Ongchuan nga nahipapatik han iya ginpagawas nga Executive Order No. 10-01. Ini in magigin epiktibo tinikangan Nobyembre 1, 2020.
Hi Ongchuan an naghimo hini nga pitad ha panuyo nga deri na maglarab an Covid-19 didto han probinsya. Han nag-agi nga tulo ka semana, waray hugpoy an paglobo han ihap han nagkakatatapnan han kagaw nga mga Nortehanon.
Dida han gibabag-uhi nga report han Northern Samar Provincial Information Office, 610 katawo an natapnan han virus ngan yana mayda 396 nga Active Cases. Mayda naman lima nga Covid Patients an namatay.
An bungto han Catarman ngan Laoang an may gidadamu-i nga kaso han virus didto han lalawigan. Sobra 20 nga mga barangay ha Catarman ngan 6 nga barangay ha Laoang an iginbutang ha “lockdown.”
Ha ilarum han kamanduan han gobernador, ngatanan nga mapakadto ha pampubliko nga lugar, lakip na an pribado nga mga establisemento ngan mga opisina, in kinahanglan mayda face mask ngan face shield.
Didto naman ha Borongan City, Eastern Samar, ginbulkas na an Granular lockdown ha pira nga mga barangay ug an Brgy Maypangdan nala an aada ha Hard Lockdown. Magpapabilin naman an Hard Border Control ha entry ngan exit points han syudad.
Nagkaada hin mga lockdown didto ha Borongan han magdumara hin contact tracing para han posible nga nagkatatapnan hin usa nga APOR nga nagpositibo han Covid. Ha bug-os nga probinsya han Eastern Samar, 86 na an natapnan ngan mayda yana 28 an Active Cases.
Ha Tacloban City, 845 na an naka-recover dida han 903 nga nagpositibo han kagaw. 43 an aktibo nga kaso hapagkayana ngan 15 an Covid Patients nga namatay.
Ha bug-os nga Eastern Visayas, 6,549 an Total Cases ngan mayda 5,549 nga Recoveries. 931 naman an Active Cases ngan 61 an naawat an kinabuhi. Ini nga mga numero in subay han report han DOH tobtob Oktubre 28, 2020. #
