Isumat.com/ Disyembre 15, 2022

Usa nga grupo in naghihingita nga deri ma-implementar an transaksyon nga pagpalit han Tacloban City Local Government Unit han Leyte Park Hotel.

Ini an iginbuyagyag ni City Administrator, Atty Jojo Lacanilao durante han Media Forum ha Hotel de Fides kakulop, Disyembre 14, 2022.

Sumala kan Lacanilao, usa nga grupo in nagsalawad hin kaso ha korte naghihingita nga igbasura an ginkasabutan han Privatization and Management Office (PMO) ngan City Government of Tacloban nga pagpalit han syudad han sobra 6 ektaryas nga propyedad. Pero, an opisyal in waray derekta nga magngaran o magtudlok kun ano ini nga grupo o hira hin-o nga mga personales an nagkokomponer han hugpo.

Kumpiyansado hi Lacanilao nga waray na makaka-ulang han transaksyon kay napirmahan na an ngatanan nga dokumento ngan umagi ha insakto nga proseso an transaksyon. Ngani, nakag- down payment na an syudad hin 100 Milyones pesos ngadto ha PMO.

An propyedad han Leyte Park Hotel in iginbaligya han PMO ha LGU-Tacloban hin 500 Milyones pesos. Nagsering hi Lacanilao nga ginkukustyon hini nga grupo nga nagsampa hin kaso kun kay-ano nga habubo o barato an presyo han nasabi nga propyedad.

An PMO an may obligasyon pagbaton han mao nga reklamo ha korte, sering ni Lacanilao, kay an nasabi nga ahensya an gintu-inan han gobyerno nga magdumara ngan magdisponer han mga propyedad nga gintatag-iyahan han gobyerno.

An syudad han Tacloban ngan PMO in nagpirmahay na han Deed of Conditional Sale kun diin nahihipatik nga babaydan an 500 Milyones pesos ha sulod hin napulo ka tuig. An pagtag-iya han propyedad in deri pa mababalhin ha ngaran han Tacloban City samtang deri pa natatapos an pagbayad, pero sering ni Lacanilao, gintatag-iya na ini yana han syudad “technically.”

Tim-os an paglaum han LGU-Tacloban nga nga dako an mahibunulig ha ekonomiya kun bumalik utro ha operasyon an nasabi nga hotel. Plano gihapon han syudad nga magkaada pa hin iba nga mga klase hin negosyo dida han nasabi nga lugar.

Panuyo han LGU-Tacloban nga magin prime destination han mga turista an Leyte Park Hotel. Sering pa ni Lacanilao, ini nga lugar in “iconic” sanglit deri angay pasibay-an.

Gintikangan na han City Government an paglimpyo han nasabi nga propyedad. #