Gin kondena han 8th infantry Division han Philippine Army an pag gamit hin Anti Personnel Landmine han mga terorista nga grupo han New People’s Army haira pag atake han mga sundalo han 20IB han Philippine Army nga nag resulta han kamatay hin usa nga sundalo ngan kasamad hin lima pa nga iba ha Barangay Osang Catubig Northern Samar kanina han aga Hulyo 19, 2022.

Sumala han tagyakan han 8th Infantry Division nga hi Captain Ryan Layug nga talapas han “Ottawa Treaty” an pag gamit hin landmine han NPA ha pag atake han mga ka sundaluhan nga nag dudumara la hin humanitarian mission han mao nga barangay.

An Ottawa Treaty in usa nga kasarabutan nga gin pirmahan hin damo nga mga nasud upod an Pilipinas han dire na pag gamit, pag tirok ngan pag himo pa hin mga Anti Personnel Landmine tungod han grabe nga perwisyo nga igin dudurot hini labi na ha mga sibilyan.

Ini nga pinaka bag-o nga pag ataki in pag pakita hin ka tarantar han mga terorista nga grupo tungod han padayon nga kampanya han gobyerno kontra han mga rebelde ha probinsya han Northern Samar nga sumala han pag analisar han militar amo nala nga probinsya ha rehiyon nga mayda nira na bibilin nga impluwensiya sumala pa kan Captain Layug.

Duha ka Batallion hin mga ka sundaluhan an gin dugang han gobyerno yana nga tuig ha Northern Samar agud pakusgon pa an pag poypoy han grupo han NPA han mao nga probinsiya.

An Barangay Osang in usa han lima nga mga barangay ha Northern Samar nga naka karawat hin mga proyekto nga nag kankan tidad hin 20 million pesos tikang han National Task Force to End Local Communist Armed Conflict (NTF-ELCAC) kumo usa nga “cleared” barangay nga anay na impluwensiyahan han mga NPA .

Han nag labay pala nga Hulyo 5 yana nga tuig usa gihapon nga landmine an bumuto ha Barangay Magsaysay Mapanas Northern Samar nga kon diin pito nga mga sundalo an na samad han mao nga pan hitabo