Isumat.com/8:38AM, August 13, 2020
Tobtob nala hiton Agosto 15, 2020 an pagtugot han Department of Education ha mga Local Government Units nga gamiton an mga eskwelahan komo Quarantine ngan Isolation Facilities.
Ini an iginmamando han Memorandum Circular 414-2020 han DepED nga iginpagawas kakulop, sumala kan Jasmin Calzita, an tagyakan han Regional Office-8. Ini nga kamanduan in pirmado ni DepED Secretary Leonor Briones.
Sumala kan Calzita, bisan kun waray pa matatabo nga face-to-face classes, kinahanglan preparado an mga classrooms kay gagamiton ini han mga magturutdo ha paghimo ngan pag-andam han mga materyales nga gagamiton han on-line o modular learning.
Kinahanglan gihapon nga mabakante na an mga classrooms basi maseguro nga talwas an mga personales han DepED kontra han virus.
Pero ginklaro ni Calzita nga puede maghangyo an mga LGUs hin extension han pag gamit hin classrooms. An mga LGUs in kinahanglan magpadara hin request letter ngadto ha National Inter-Agency Task Force para han extension. Kataliwan hini, an National IATF ug an DepED in magsasabot kun aaprobaran an request.
Iginpasabot ni Calzita nga damo na an nag-request hin extension nga LGU antis pa gumawas ini nga memorandum han departamento. Sobra na 60 nga LGUs an naghangyo hin pagpahilawig han panahon nga paggamit han school buildings.
Kun aprobaran han National IATF ngan DepED an extension, masunod hini an mga Regional Offices.
Hapagkayana, sobra hin 6 Mil nga mga classrooms ha Eastern Visayas an gingagamit komo Quarantine ngan Isolation Units. #
