An biktima nga hi James Diaz Maghanoy. (Photo from fb)

Isumat.com/Nobyembre 19, 2021

Naawat an kinabuhi hin usa nga opisyal han Commission on Elections (COMELEC) ha Northern Samar han paarakan hiya hin bala hin waray panhikilal-i nga suspetsado kakulop nga adlaw, Nobyembre 18, 2021.

Ginkilala han mga otoridad an biktima nga hi James Diaz Maghanoy, 42 anyos, may asawa ngan mga anak ngan nag-uukoy ha Brgy Cawayan, Catarman, Northern Samar.

Hi Maghanoy an Municipal Election Officer ha Lope de Vega, Northern Samar.

Dida han imbestigasyon han mga kapulisan, an biktima in nagmamaneho han iya motorsiklo ngan tipa-uli na tikang ha Lope de Vega ngadto ha Catarman han tigda la nga may nagpanmumusil ha iya. Nag-antos hin mga igo hin bala hi Maghanoy ha ulo ngan lawas hinungdan han iya kamatay.

Kadagmitan naman nga kinmalagiw an mga gintatahapan katapos han krimen.

An mga tinubyanan han balaud in nagdudumara yana hin imbestigasyon basi masabtan kun hin-o an nagbuhat han pagpatay. Lakip gihapon han imbestigasyon an panginano kun may kalabutan ha trabaho han biktima an nasabi nga insidente. #