Isumat.com/7:32AM, August 25, 2020

Tungod han tigda ngan padayon nga paghitaas han mga kaso han Covid-19 ha Tacloban, nagdesisyon an City Government nga magpadulot hin mas istrikto nga patakaran ha merkado publiko han syudad.

Tinikangan Agosto 25, an ngatanan nga katawhan nga mapakadto ha merkado in kinahanglan nakasul-ot hin face mask ngan face shield ngan dara an ira QR Code Pass. Kun deri ini kumpleto nga mga rekisitos, deri tutugutan nga makasulod ha merkado.

Igbabalik gihapon an mahugot nga inspection ha Entry Points han merkado. An duha nga Entry Points in namumutang ha eskina Burgos/Torres samtang an usa in sapit han McDonalds. Duha gihapon an Exit Points ug aadto ini ha Fish Port ug eskina Tarcela/Rizal Avenue.

Deri na gihapon tutugutan nga makasulod an mga pampubliko nga sarakyan ha merkado publiko. An mga senior citizens ngan menor de edad in deri gihapon makaka-entra ha merkado.

Hapagkayana, umabot na ha 211 an nagkatatapnan ha Tacloban ug haros usa ka gatos an Active Cases. Kadam-an han nagkatatapnan in pinaagi han Local Transmission. #