Hi Stella Nicole Yape (center) nga gold medalist han CPJ National Taekwondo Championships.

Padayon an waray hunong nga paghakot hin medalya ha larangan han taekwondo ni Stella Nicole Yape nga taga Kananga, Leyte. Dida han Pebrero 9, hiya an nakadaog han gold medal dida han Girls Juniors Individual Freestyle Poomsae category han 2020 Carlos Palanca Jr (CPJ) National Taekwondo Championships nga gindumara ha Mall of Asia, Pasay City.

Hi Nicole nga 17-anyos ngan Grade 11 ha University of Santo Tomas amo an nagin prinsesa han iya dibisyon kun diin klaro kaupay nga hiya an magdaraog han iya ginpasundayag nga mga kiwa ngan porma nga amo an ginbasaran han mga hurado basi ihatag ha iya an gold medal. Nakuha naman han Western Visayas an silver ngan bronze medal dida hini nga dibisyon.

An CPJ National Championships an gintutudlok nga “Elite Tournament” han taekwondo ha Pilipinas kay napartisipar denhi an gigkakariti nga mga taekwondo jins han ngatanan nga rehiyon. Nagseserbe gihapon in inga torneo nga screening para han karuyag magin miembro han national team, sugad man paghag-id para han national team members nga igpapadara ha international tournaments.

Hi Nicole in kaapi na han Philippine team ug damo na nga mga medalya an iya naangkon. Hadin Nobyembre, gold medalist hiya dida han 2019 National Inter-School Championships. Nagin gold medalist gihapon hiya han 2019 Palarong Pambansa kun diin hiya ug an iya manghod nga bugto nga hi Jeus an nagin kampeon han Mixed Pair Category. An magbugto in nakakuha gihapon han mixed pair silver medal dida han Best of the Best MVP National Championships.

Ini in labot la han diri na maiihap nga mga medalya nga ira nadag-an ha mga kompetisyon ha Eastern Visayas ngan iba pa nga national tournaments. Hi Nicole in nag-eskwela ha Kananga National High School (KNHS) para han iya junior high school antis hiya bumalhin ha UST. An mga kag-anak nira Nicole ngan Jeus amo hira Roderick Roderick ngan Joyce Ann, nga mga blakcbelters ngan national referees han taekwondo. An magti-ayon nga Yape in parehas mga magturutdo ha KNHS ha Kananga, Leyte kun diin hira in nag-uukoy upod kan Jeus. # (KEVIN SIOSANA)