Isumat.com/8:10AM,June 22, 2020

An National Buraeu of Investigation (NBI) in magdudumara hin parallel investigation kasumpay han pagpataya han empleyado han DENR-Region 8 ha Burauen, Leyte hadin nag-agi nga bulan.

Sumala kan Atty. Meljun Diasanta, hepe han Legal Division DENR-8, an NBI in magsususi han motibo ngan kun hin-o an nagpapaluyo han pagpataya kan Fernando Polenio, nga amo an Assistant Protected Area Supt ha DENR Ecolodge, Mahagnao Park, Burauen, Leyte.

Hi Polenio in pinusil pinaagi hin shotgun hadton tabis han kagab-ihon han Mayo 28, 2020 didto han nasabi nga lugar. Hadto nga takna, an biktima ug an iya ka-usa ha trabaho in naghihimangraw han tigda nala pusilon hin deri kilalado nga suspetsado an DENR Forester hinungdan han iya kamatay.

Tobtob yana, sugadsugad nga mahinay hin duro an imbestigasyon kay waray ginhahatag nga update an mga imbestigador han Burauen Municipal PNP Office.

Kasumpay hini, ini nga panhitabo in mahugot nga ginkondenar han DENR Lawyers Guild, Incorporated (DLGI), ug ira gintudlok ini nga insidente nga makangingirhat nga panhitabo labi na kay an biktima in nagseserbe ha pagpanalipod han kalibungan.

Sumala pa han grupo, na-aalarma na hira kay denhi ha Pilipinas damo na nga mga indibiduwal an pinanmatay dara han ira pagsurapo kontra han illegal logging, mining ngan industrial agriculture. Ira gihapon ginsusnan an maiha nga dalagan han hustisya ngan pipira-pira la an nasisirutan nga mga nakasala.

Nagsering pa an DLGI nga kinahanglan magbaton ha balaud an nagpapaluyo han kamatay ni Polenio kay makakawang la an ira panlimbasog pagproteher han kalibungan kun deri maatubang ha hustisya an mga suspetsado.

Nananawagan gihapon an grupo ha publiko nga kun hin-o man an mayda impormasyon kasumpay hini nga panhitabo, igsumat ini ha NBI, ha PNP o mismo ha DENR basi makabulig pagsolbar han kaso.

An DLGI in organisasyon han tanan nga abogado ha DENR ug nanguna ha pagtindog han hugpo amo hira Atty Nerlito Eneran, Director han DENR Legal Affairs Service; Atty Camilo Garcia, Chief han Legal Research; ngan Atty Ernesto Adobo, Undersecretary for Legal Administration and Finance. Hira ngatanan in mga taga denhi ha Eastern Visayas. # ( KEVIN SIOSANA w/ report from Al Ellema)