Isumat.com/10:46AM, September 13, 2020
Gintiris han Los Angeles Lakers an Houston Rockets, 116-96, dida han Game 5 han Western Conference Semis basi maka-aabante hira ngadto han Conference Finals ha kartada nga 4-1.
Pagtikang pala han mulay, naglalalahinggab na an Lakers ha panguna ni Lebron James sanglit dida pala han 1st quarter nakahimo na hira hin 22 puntos nga labaw. Pira ka beses nga naglanat an Rockets pero klaro gud nga waray nira igpapanta nga armas kontra han poderoso nga Lakers.
An Los Angeles in nagpa-arak hin 20 nga 3-pointer ngan ini an nagin instrumento dida han ira pagtamas-tamas han Houston.
Hi Lebron James in nakahikay hin 29 puntos, samtang lima han iya ka-urusa an nag-amot hin porlomenos 10 puntos kada usa. Ha panig han Rockets, hi James Harden an mayda 30 puntos pero an iya ka-partner ngahi Russel Westbrook in nagrehistro la hin 10 puntos.
Maghuhulat an Lakers han makakatalwas han kumbati ha butnga han Clippers ngan Denver Nuggets. An duha nga grupo in magrarapo ha Game 6 buwas kun diin abante an Clippers, 3-2, ha ira serye.
Dida naman hiton Mierkules, an Miami Heat ngan Boston Celtics in magbabanggaay para han Game 1 han Eastern Conference Finals. #
