Isumat.com/7:16AM, September 7, 2020
Waray sumugot an Milwaukee Bucks nga pagsiphiron hira han Miami Heat ngan nagpadayon an ira paglaum nga igpadayon an tinguha nga maka-abante ha Eastern Conference Finals.
Dida han Game 4 yana nga adlaw, nakatalwas an Bucks bisan kun waray na makagpadayon pag-oyag an ira star player Giannis Antetokounmpo tungod nga nagtikagrabe an iya ankle injury. Hi Khris Middleton an nagpas-an han Bucks basi nira perdihon an Heat ha overtime, 118-115.
Hi Middleton an nagbandera dida han overtime kun diin hiya an nakahimo han 9 han 11 puntos han Milwaukee. Hiya in nagsaburak hin 36 puntos ngan nagkolekta hin 8 assists ngan 8 rebounds.
Ha panig han Miami, nanguna ha scoring hi Bam Adebayo pinaagi hin 26 puntos, pero an ira lider nga hi Jimmy Butler in nakahimo la hin 17 puntos.
Ha atubangan hini nga pakadaog han Bucks, sugadsugad nga ‘Mission Impossible’ an ira tutugkaron yana kay kinahanglan ira madag-an an nasasalin nga 3 nga mulay basi padayon an ira paglaum. Dako ini nga problema kay hi Antetokounmpo in deri na segurado nga makakagmulay pa. Kun maka-oyag man hiya, deri syento porsyento an iya diskarte tungod han karamtan ha tiil nga gin-aantos.
An Miami in napakyas nga makadaog tungod kay waray gumana an ira bench players nga pirmi dako an kontribusyon dida han syahan nga tulo nga oyag.
Tatalinguhaon han Miami nga tuldokan na an serye dida hiton Mierkules samtang manlilimbasog naman an Bucks nga makadaog utro. Tulo na an daog han Miami ngan usa pala an Bucks. An makakadaog han serye in ma-abante ha Eastern Conference Finals kun diin igkaka-atbang an magdadaog ha butnga han Boston ngan Toronto nga tabla yana ha tagduha nga daog dida han ira asdangay. #
