Isumat.com/7:47AM, Enero 15, 2021
An Ormoc City in magigin kaparte han paningkamot han Pilipinas nga maka-angkon hin kadugangan nga slots para han mga players nga makakagmulay han Olympics nga bubuhaton yana nga tuig ha Tokyo, Japan.
Ini in tungod kay an national team han fencing (pa-isan-isan ha espadahay) in maghihimo han ira training ha Ormoc ha sulod hin duha ka bulan, subay han desisyon han Philippine Sports Commission (PSC).
Dida han report han Manila Bulletin, naghangyo an Philippine Fencing Association ha PSC nga tugutan an ira grupo makag-ensayo para han Olympic Qualifying Tournaments, ASian Championships, ngan SouthEast Asian Games. Ini nga request an gintangdu-an han PSC.
Antis pa hini, an asosasyon in nakighimangraw ha LGU-Ormoc mahitungod han mga detalye han training. An presidente han fencing association amo hi Richard Gomez nga alkalde han Ormoc.
Ginkasarabutan nga an training in tikang Pebrero 6 tobtob Abril 6, kun diin unom nga Pilipino nga fencers in mabiyahe ngadto ha Ormoc upod na gihapon an sobra napulo nga coaches ngan training staff.
Katapos han ensayo ha Ormoc, malakat an mga players ha Korea para han Olympic Qualifyers hiton Abril 15-22, kun diin pipili-on an mga Asyano nga makakasulod ha Olimpyada ha Tokyo hiton Hulyo. An Olympics in nakatalaan unta ini hadton 2020, pero igin-ugsod ini yana nga tuig dara han Covid Pandemic.
Hi Gomez in usa anay nga SEA Games Fencing Gold Medalist ngan nakaapi na hadto han Olympics. #
