(photo/image by iasjunior.com)

Waray na paka-ilob han kauhaw han makahurubog nga irimnon in tulo nga parupangisda, nag-irignom ha ligid han kalsada….an resulta, pinansikmit han kapulisan ngan posible nga kasuhan pa.

Sumala han blotter han Abucay Police Station ha Tacloban, an tulo nga mga suspetsado nga ginkilala nga hira Ryan Dagol, Julyboy Basoy ngan Kent Wilmar Seryoso, tanan residente han Brgy. 67, Anibong District an ginpaslak ha karsel dara han ira pakatalapas han liquor ban nga iginpapatuman yana han syudad dara han COVID-19.

Hinsabutan nga an tulo in nag-irignom ha ligid han kalsada han ira barangay ug inabtan na ini han tabis han kagab-ihon. Iginreport ini hin residente ngadto han barangay officials ngan ginsaway han mga tanod an nagtatagay-tagay. Pero imbes nga mag-urundang ngan magka-uli, nagpadayon la pag alsa-baso tobtob nga pasado alas dose na han maagahon yana nga adlaw, Marso 28, 2020 .

Dida hini, nangaro na hin ayuda an barangay ha Abucay PNP ngan kadagmitan pinmakadto an mga kapulisan ug ira gud man naaktuhan nga gingaganahan pa ha pag-irignom an mga suspetsado. Dayon nira ini pinansikmit ngan ginsulod ha lock-up facility.

Hapagkayana, gin-aandam han mga otoridad an posible nga mga kaso nga igsasampa kontra han tulo nga mga suspetsado. #

(Posted 7:43 AM, March 28, 2020)