(File image by eutoday.net)

Isumat.com/ Enero 5, 2023

Usa nga parag-uma ngan usa nga high school student an nahidugang dida han ihap han mga nagkalulumos ha Rehiyon Otso tungod han maraot nga panahon nga na-eksperiensyahan han rehiyon tikang han antis mag-Pasko tobtob han syahan nga pira ka adlaw han bag-o nga tuig.

Didto ha Leyte, Leyte, an parag-uma nga hi Edito Arcenal, 54 anyos, residente han Brgy Ugbon in natad-an nga patay na kakulop, Enero 4, 2023.

Ha inisyal nga imbestigasyon, pasado alas 4 han kulop han Enero 3, hi Arcenal in pumakadto han salog basi manirok hin lubi, pero waray makabalik ha ira balay tobtob han katutnga han gab-i, hinungdan nga nabaraka na an iya pamilya.

Ginpanmiling hiya ngan natad-an an patay nga lawas kinabuwasan na nga nalutaw didto han salog. Gintotoohan nga nadara han makusog nga agos han tubig ngan nalumos an biktima.

Samtang, usa naman nga 16-anyos nga lalaki an gintotoohan nga nalumos ha Baras, Palo, Leyte.

An biktima in Senior High School student ngan nag-uukoy ha Purok Punay, Brgy Baras. An iya patay nga lawas in natad-an han nagbabantay han Red Beach didto han mao nga lugar, Enero 4, 2023.

Iginsumat han amay han biktima nga pasado alas 7 han gab-i, Enero 3, lumakat ha ira balay an ulitawohay ngan waray na bumalik tobtob nga nakit-an an iya lawas kinabuwasan.

Tobtob han ginsusurat ini nga notisya, pito katawo na ha Sinirangan Bisayas an nahireport nga nagkamamatay tungod hin kalumos. Mayda pa 9 katawo nga nagkakawawara tobtob yana. An lima han mga namatay in mga parupangisda.#