Isumat.com/Nobyembre 18, 2021
Waray na kaso nga murder nga aatubangon hi Emilio “Emil” Zosa, usa nga retirado nga koronel han AFP ngan prominente nga pulitiko ha probinsya han Samar.
Ini in kataliwan la nga uyunan han husgado an pitad han DOJ-National Prosecution Service nga ig-withdraw an nasabi nga kaso kontra kan Zosa.
Hi Judge Lolita Mercado han RTC-Branch 46 ha Tacloban City, in nagmando hin recall ngan pagkanselar han Warrant of Arrest kontra kan Zosa nga iginpalusad hadin Seytembre 2021. Ini in tungod kay gin-uyunan han korte an mosyon han DOJ nga bakwi-on an mao nga kaso.
Tungod hini, waray na gahum an arrest warrant kay waray naman kaso kontra kan Zosa.
Kun manunumduman, hi Zosa ngan upat pa nga iba in ginsampaan hin murder case tungod han pagpatay nga natabo ha Sta Margarita pira na ka tuig an nakalabay. Igin-alegar han usa nga suspetsado nga na-aresto nga an anay koronel an mastermind han krimen.
Iginsampa han DOJ an kaso ha korte ngan hadin Setyembre iginserbe an arrest warrant, pero an bayaw la ni Zosa an kumarawat han dokumento kay waray didto an akusado ha iya panimalay. Tikang hadto, waray na magpakita hi Zosa.
An iya kampo in nagsalawad hin mosyon ha DOJ nga magdumara hin hingpit nga pagrepaso han kaso kun diin ira igindig-on nga waray kalabutan hi Zosa han krimen. Katapos hin pira ka bulan nga pag-utingkay han mosyon, umabuyon hini an DOJ nga nagduso han ahensya nga ig-withdraw an kaso.
Ginklaro naman han husgado nga bisan kun deri na apektado hi Zosa hini nga kaso, igpapadayon naman an pagbista kontra han iba nga mga akusado.
Nagtotoo hi Zosa nga ini nga paghilambigit niya han kaso in ginpapaluyuhan han iya mga kaatbang ha pulitika didto han lalawigan.
Hiya in duha na ka beses nga dumalagan ka gubernador han Samar pero perde hiya han kandidato tikang han poderoso nga pamilya Tan.
An misis ni Emil nga hi Sta Margarita Mayor Gemma Tan in kandidato yana ka gubernador han Samar kontra kan 1st Dist. Cong. Sharee Ann Tan.
Hi Emil in dumalagan naman ka alkalde ha Sta Margarita. #
