Isumat.com/4:03AM, August 19, 2020

Tinikangan yana nga adlaw, Agosto 19, makaka-angkas na ha motorsiklo an mga miembro han sulod-balay o pamilya bisan waray barrier o dibisyon dida han sarakyan, subay han pahayag kagab-i ni Lt General Guillermo Eleazar, an nagungulo han PNP Task Force Covid Shield.

Nagsering hi Eleazar nga ini nga bag-o nga kamanduan in igpapasunod ha mga llugar nga aada ha ilarum han General Community Quaratine o GCQ. Iya pa igindugang nga an mga alkalde han mga lugar nga aada ha Modified General Community Quarantine (MGCQ) an magdedesisyon kun masunod hira hini nga bag-o nga patakaran. An bug-os nga Rehiyon Otso in aada yana ha MGCQ.

Pero ginklaro Eleazar nga para la ini han mga na-angkas nga kaapi han pamilya o nag-uukoy ha usa la nga panimalay. Igpapadayon gihapon an barrier kun deri nag-uukoy ha usa nga balay an magka-angkas.

Igindugang pa han opisyal nga an motorsiklo in kinahanglan pribado ngan deri gingagamit nga pampasahero ngan dapat mayda helmet ngan face mask an driver ug an angkas.

Kun manunumduman, gintapo hin mahugot nga pagsuson ngan pagtipa han publiko an naha-una nga kamanduan han National Inter-Agency Task Force nga gamiton an barrier han mag-aangkas ha motorsiko. Bisan ngani mismo an mga lideres han LGUs ngan damo nga kapulisan in natipa hini pero ira la ginsunod tungod kay sugo man han National IATF.

Iginkalipay naman ini yana nga pagbawi han kamanduan han mga motorista labi na gud an nasarig la ha motorsiklo tungod han pagkulang han pampubliko nga sarakyan ngan mahal nga pamasahe. #