Isumat.com/7:51AM, December 31, 2020
Talwas ngan aada yana ha maupay nga kahimtang an panlawas han baby boy sugad man an iya iroy nga nag-anak ha sulod han patrol car han Kawayan, Biliran Municipal PNP Station hadin Disyembre 29, 2020.
Dida han impormasyon tikang ha Biliran PNP Provincial Office, alas 3 han kulop han makakarawat hin tawag an PNP Mobile Force Platoon ha Brgy Madao, tikang kan Brgy Chairman Rolly Culibra han Brgy Ungale. Hi Kapitan Culibre in nangaro hin bulig basi madara ha Rural Health Unit han bungto an usa nga residente ha iya barangay nga nahingaranak na.
Hi PLt Sammy Paning in kadagmitan nga nagmando kan Patrolman Presco Adorable nga pagmaneho-an an patrol car ngan dad-on an mangaranak ha RHU. Kadagmitan pumakadto han lugar hi Adorable ngan iginsakay an babaye ug an iya mister.
Samtang nagbibiyahe na hira tikadto ha RHU, nakakita an mister nga gumawas na an ulo han baby antis pa hira umabot ha klinika. Nagbulig hira Adorable ug an mister pagpa-anak han babaye ha sulod mismo han sarakyan.
Kataliwan han panganak, nagpadayon hira pagkadto ha RHU kun diin ha gilayon nga takna gintimangno han mga personales han klinika an iroy nga ginkilala ngahi Maria Fe Agustin ug an iya baby boy.
An Biliran PNP in nagpabati han ira pagdayaw han nahimo ni Adorable ha pag-asister han paghinglaw ni Agustin ha patrol car. #
