Isumat.com/9:32AM, October 22, 2020

Nahulog ha mga kamot han balaud an usa nga anay kaapi han Kerwin Espinosa Drug Group nga naatubang hin kaso nga pagpatay.

Dida han report han Biliran Police Provincial Office, an suspetsado nga hi Rex Arcosiba in nasikop ha Panacan, Davao City hadton Oktubre 21, 2020. Hiya in naatubang hin kaso nga murder tungod han iya paghilambigit han pagpatay hin usa nga langyawanon ha Brgy Agpangi, Naval, Biliran hadton Hunyo 2016.

Hi Arcosiba an gintutudlok nga numero uno han mga Most Wanted ha probinsya han Biliran. Hiya an nadakop pinaagi han pagburubligay han mga elemento han Biliran PPO, Naval Municipal PNP ug an mga operatiba han Davao City PNP.

Maiha na nga ginhihinalpaton han mga otoridad an suspetsado han makasagap hira hin impormasyon nga nasipatan hi Arcosiba ha Davao. Kadagmitan nagplano hin operasyon an mga tinubyanan han balaud nga nagresulta han kadakop han wanted nga tawo.

Gindara hi Arcosiba ha Davao City PNP para han kaangayan nga dokumentasyon ngan nakatalaan igbiyahe ha Naval, Biliran basi atubangon an kaso kontra ha iya.

Hi Arcosiba in ginngaranan han kapulisan nga nagin miembro han sindikato han droga ni Kerwin Espinosa han Albuera, Leyte.

Hi Police Col Julius Coyme in nagdayaw han iya mga tauhan dara han malinangpuson nga operasyon kontra kan Arcosiba. Sering pa ni Coyme, ini in magseserbe nga warning ngadto han mga kriminal nga maabot manta an takna nga malaparag hira ha kamot han balaud. #