Isumat.com/Mayo 3, 2021
Waray hin-o man an puede pumakadto o pumasyada ha mga destinasyon hin turismo ngan mga resorts ha probinsya han Biliran tinkangan hiton Mayo 6, 2021 tobtob nga deri ginbubulkas ini nga kamanduan.
Hi Gobernador Rogelio Espina an nagpagawas hin Executive Order nagdederi ha bisan hin-o, taga Biliran o deri taga Biliran, ngan bisan tikang diin, hin pagkadto han nasabi nga mga lugar kay temporaryo nga ginsadhan ini nga mga facilidadis ug mga aktibidadis may paghisumpay hini.
Nagdesisyon an pamunuan han lalawigan nga himoon ini nga pitad tungod han nagtitikahitaas na liwat nga kaso han Covid-19 didto han probinsya ug an peligro nga magsarang pa ini.
Kun manunumduman, pira pala ka semana an nag-agi, hinay-hinay na unta nga gin-aabrihan an operasyon han mga resorts ngan tourists destinations ha Biliran, pero tigda liwat nagtikadamo an nagkatatapnan han virus didto han probinsya ngan iba pa nga parte han Eastern Visayas.
Lakip gihapon han kamanduan han gobernador an pag-implementar hin Mandatory 14-Day Quarantine ngadto han tanan nga mga biyahedor nga masulod ha Biliran sugad han mga langyawanon, OFWs, Returning Residents ngan mga LSI tikang ha gawas o sulod han Region 8.
An mga Biliranon nga magawas han probinsya ngan mabalik ha Biliran katapos hin 3 ka adlaw o sobra pa in kinahanglan gihapon mag-kwarentina hin duha ka semana. Puede ha balay ini himo-on kun mapasar ha assesment han health authorities, kun deri pumasar aadto an kwarentina ha mga facilidadis han tagsatagsa nga LGUs. #
