Isumat.com/8:15AM, July 7, 2020

Katapos hin pira ka adlaw nga pag-inantuson ha Manila dara han makuri nga kahimtang antis hira makabiyahe, iginkahibalag pa gud hin remalaso in 21 nga Locally Stranded Individuals han ma-aksidente an ira ginsasakyan nga bus kakulop.

Sumala han report, an Partas Bus in nagsusulsog han national highway ha Brgy Caticugan, Sta. Rita, Samar han mawarayan kontrol ha manibela an drayber ha usa nga kurbada. Sumurop an bus ngadto han kakugnan ha ligid han kalsada ngan nakaguba hin balay ngan poste hin telecommunication company.

Nakatalwas naman an ngatanan nga pasaheros ug an drayber ngan pahinante han bus. Waray gihapon nahisumat nga nasamaran dida han nag-uukoy han balay.

An mga pasaheros in iginbalhin ngadto han iba nga bus ngan nagpadayon an ira biyahe ngadto ha Mindanao.

Sobra hin 70 nga mga bus luran an mga LSI nga tipakadto ha Mindanao an umagi ha Samar ngan Leyte kakulop.

Ini nga Partas Bus Company amo an gin-arkila han gobyerno basi igdul-ong an mga LSI ha Mindanao. An nasabi nga kompaniya hin bus in deri hi-ara hin biyahe ha aton dapit kay an mga ruta hini in tikang ha Manila ngadto ha Norte nga dapit han nasud. #