Isumat.com/8:15AM, July 13, 2020

Katapos han duha ka semana nga suspensyon han pagkabalik han mga Locally Stranded Individuals nganhi ha Region 8, nagtikang na pagka-abot an mga LSI ha magkalainlain nga lugar han rehiyon tinikangan dida han Hulyo 10.

Pero an mga lalawigan han Biliran ngan Northern Samar in deri makarawat han mga LSI. Ini in dara han ira hangyo ha Regional COVID Task Force nga igpabilin an travel ban han LSI ha ira lugar tungod han limitado nga mga facilidadis han LGUs ngan mayda pa waray maka-recover nga mga pasyente nga adto ha Isolation Centers.

Ini nga hangyo han duha nga probinsya in gintangdu-an han Task Force ngan pinirmahan ni Regional IATF Chairman Minerva Molon nga amo an Regional Director han DOH.

An suspensyon han pagkabalik han LSI dida han duha nga probinsya in magpapadayon tobtob Hulyo 31.

Nagsering hi Molon nga an Biliran ngan Northern Samar in waray Level 3 Health Care Facility, limitado an bed capacity han mga hospital, ngan deri damo an medical personnel.

An iba nga probinsya ngan syudad ha Region 8 in nagtikang na liwat pagkarawat han mga LSI dida han Hulyo 10 ha atubangan han pagkabaraka han posibilidad nga paghitaas na liwat han mga Positive Cases.

Kasagaran han mga LSI nga nagpositibo in tikang ha Cebu ngan Metro Manila. #